Meh nennt das SpiIl au 31er oder Schwümme

So wird das Kaartespiil gspiilt
Am Aafang vom Spiil bekunnt jedä Spiiler drey Kaarte uusteilt. Dr Gäbr teilt sich uusserdäm e wiitere Dreyerpagg uus. Drno het dr Gäbr hat d Möögligkäit, sich eine vo siine bäide Dreyerpagg z bschaue. Drmit muess är sich denn entschäide, ob är mit dene - oder ungsee mit em andäre Dreyerpagg spiele mööcht. S Degg, für das är sich nid entschäidet, wanderet uufdeggt in d Mitti. Dr Spiiler rächts vom Gäbr eröffnet s Spiel und isch an dr Räie. Isch en Spiiler an dr Räie het är d Möögligkäit, entwäder genau ei Kaarte in d Mitti z legä und drfyr genau ei andäri Kaarte uus dr Mitti uufznäh oder är ka siini kompletti Hand gegä diä drey Kaarte dr Mitti z dusche. 

Uusserdäm kann är au klopfen. Do drbii verzichtet är druf, ei Kaarte z dusche, sondern lüütet so s Ändi vo dr Rundi  ii. Jedä andäri Spiiler het drno no genau ei Zug füürig.

Ziil vom Spiil isch es, 31 Punggt uuf dr Hand z heebe. Drbii zelle nur Kaarte mit dr gliiche Farb (zum Bispiil zelle Krüüz-Damä, Krüüz-König und s Härz-Ass nur 20 Punggt, fyr e 31 miest s Härz-Ass ine Krüüz-Ass duscht wärde). D Bildkaarte zelle drbii zehn Punggt, s Ass elf, d Zaalekarte ihrä normalä Zaalewert. Het äi Spiiler 31 Punggt vo ere Farb, legt är diä sofort uuf dr Tisch und do drmit ändet diä Rundi sofort.
Genauso isch es au bi drey Ass uf dr Hand. Diä miesse sofort uuf dr Tisch glegt wärde und mit däm Blatt träte ei Sonderregelig in Graft.
En andäri Mögliggkäit, um uuf gueti Pünggt z choo, isch drey Kaarte mit de gliichä Kaartewärt z sammle, also zum Bispiil drey Dame. Die zelle denn als 30 1/2. 

Dr Luuser vo däre Rundi isch däjenig Spiiler mit em gläinschte Kaartewärt uuf dr Hand – dä bekunnt ei Strich. Het är 3 Strich, denn isch är am schwümme!! Sot är nomol abluuse, gilt är als abgsoffä und schäidet uus em Kaartenspiil uus.

Sonderregäligä:

1. Rundi mit 3 Ass: Jedä andere Spiiler (usser däjenig mit de 3 Ass) bekunnt en Strich
2. Fehler bim Kaartevertäile: Gäbr bikunnt automatisch en Strich

S Spiil isch beändet, wenn nur no äi Spiiler ybrig isch. Drno gits vo dere Spiilrundi e Ranglischte (1. Blatz, 2. Blatz, 3. Blatz, etc.) und entsprächend sovil koschtets dr Iisatz (1 Frangge, 2 Frangge, 3 Frangge, etc) em jewilige Zoggeli.
Abwäsendi Zoggelis wärde automatisch als letschte in dr Ranglischte gwärtet.

Mit däm Spiil finanziere mir unser Zoggeli Waagedrepfli fyr d Fasnacht :-)