Kontaggt | Links | Impressum 

......... Neys .........

08.09.2017

Zoggelis on Tour 2017

Die Zoggee[mehr]

Kategorie: Allgemein

06.09.2017

letschte Högg vor em Uusflug

So, bald i[mehr]

Kategorie: Allgemein

30.06.2017

Neues Zoggeli Mitglied

Die Zoggel[mehr]

Kategorie: Allgemein

........ Termin ........

Member Login

Anmelden

Gästebuch          

Moorgesträich

Dr Moorgesträich am Määndigmorge um 4.00 Uur isch dr Uuftaggt vo dr Faasnacht.

Zue däm Zitphunggt wird d`Innerstadt rüübis verdungglet und d Basler Stadtwäärgg schalte d Stroossebelüüchtig uus. S einzig Liecht chunnt vo de Gligge Ladäärne, wo ihre Süüschee doodruff breschtiere. Vor de Gligge wird e grossi, bis zue 4 m hööchi Zugladääerne draage oder uf em Waage zoge. Di Aggtiive draage zuedäm e Kopfladäärne. Be einige Gligge sin si einheitlich und diene als Erkennigsäigeschaft für d Gligge Zueghöriggkeit, do die Faasnächtler am Moorgesträich traditionell keini einheitliche Goschdüüm trage. Die offeni Gläideroornig wird Charivari gnennt. Ufs Kommando "Moorgesträich, vorwärts, Marsch" vo iirem Dambuurmäioor setzt sich d Gligge in Bewegig. Alli Gligge drummle und pfiffe zerscht dr gliich Marsch, er het drum dr Name "Moorgesträich". Guggemuusig spiele am Moorgensträich nid. Zum Moorgesträich hän d Bäize und Wiirtschafte in dr Innerstadt offe, vieli drvo bliibe di gsamte 72 Faasnachts-Stunde durchgehend offe. Traditionelli Faasnachtsspiise sin: Määlsuppe und Ziibelewääie oder Chäswääie.

Goorteesch

Als Goorteesch wäärde d Fasnachts-Umzüüg bezeichnet, wo am Määntig- und Mittwuchnomidaag ab de 13:30 duur d Innerstadt stattfinde. D Umzüüg laufe uf zwäi Rutte, äinti inneduure und di anderi usseduure, wo geegenenander verlauffe. D Umzüüg lauffe nid, wie bim Rosemäändigsumzuug in Köln und Mainz, vo A nach B, sondern zirguliere, wobi jedi Gligge amene andere Ort uf dr Route aafange. Jedi Gligge het zwar ihri feschte Abmarschphünggt und Zit, leggt abr Ort und Duur vo iire Pause spontan sälber fescht. Drmit gits also kei feschti Rääiefolg vo Gligge wäärend em Goortesch. Drum legt d Beppi denn au Wäärt druff, dass es sich ebe nid um en "Umzuug" duet handle (Allgemeine Bezeichnig "Cortège" isch nüt anders als s französische Wort für Umzug). Wäärend de Umzüüg zäige au d Waagengligge ihri meischt uufwändig baute Faasnachtswaage, uf dene sie ihr Süüschee umgsetzt hän. Vo de Waage wärde Schäggsache und Obscht an Binggis verteilt und Blueme an Mäidli verschänggt. Wär allerdings kei "Blaggedde" het, brucht gar nid uf dr Waage loszlaufe, är wird höggschtens e Ladig "Räppli" bikoo.

Binggis- und Familiefaasnacht

D Binggis- und Familiefaasnacht findet am Zischtig statt. Au do gits wieder en Gorteesch dur d Stadt, allerdings zäige sich nid Gligge in Gruppe, sondern vor allem Familie mit iire Binggis. Mängmol hän au befründeti Familie gmäinsam en Waage härgrichtet. Wenn di Aggtiive us verschiidene Gligge sich zämmeschliesse, gseht me di verschiidlichschte Larve uf äim Huffe. Vo de Binggis, bsunders vo de Siidebolle, wird allgemäin no nid erwartet, dass sie sich duureduur in schwääre Goschdüüm verkläide. S hüffigscht Goschdüüm näbe de traditionelle Figure sin Cowboys, Prinzässine und nöierdings immer hüffiger Tier wie dr Dinosaurier.

Stäärnmarsch

Der Uuftaggt zue de Guggekonzäärt am Zischtigobe  fangt mit eme gmeinsame Stäärnmarsch vo de IG - und FG Guggen aa. Dr Staart isch um 18:30 uf em Mässeblatz. D Route fiert via Mässeblatz - Glarastrooss - Mittleri Brugg - Iisengass - Määrtblatz - Gärbergass. Dört teile sich d Guggene je no Gsellschaft uuf:

FG: - um Hauptposcht - Rüedengass - Freiestrooss - Määrtblatz

IG: - Gärbergass - Baarfi - Stäinenbärg/Casino

Gugge-Konzäärt

Am Zischtigobe ghört d Gegend um dr Määrtblatz (Konzärt vo de FG-Gugge), Baarfi (Konzärt vo de IG-Gugge) und Glaarablatz (Konzärt vo de "wilde" Gugge) de Guggemuusig-Gligge, wo mit ihre Inschtrumänt für Stimmig soorge. D Pfiffer-Gliggene ziehn sich in dere Zit in d Sitegassene zrugg. D Guggene bliibe uf ihrem Marsch dur d Innerstadt immer wieder mol stoh, spiele für di anwäsende Zueschauer vier bis fünf Stüggli und lauffe denn witer. Es isch au mööglig, dass sich d Gligge au mol in es Kaffi oder e Bäiz gwaggle und den dört vor de Gäscht es Ständli spiile.

Waage- und Reggwisite Ussstellig

Eebefalls vom Määntigobe bis Mittwuchmorge findet uf em Kasärneblatz d Ussstellig vo de Waage und Reggwisite statt. Uffgrund vom beschränggte Blatzagebot könne lediglich 25 vo de 120 am Gorteesch däilnäämende Waage uusgschtellt wäärde. Drzue stöön rund 40 Reggwisite uus de verschiidenschte Gruppierige. Dr gsamti Blatz wird wäärend dr Nacht belüüchtet und bietet e schöni Stimmig. In de Rüümliggkeite vo dr Kasärne befindet sich e grossi Bäiz, wo de Gescht nääbe Koscht au Unterhaltig dur Guggemuusig und Schnitzelbängg aabiete. Am Zischitgnomidag könne Binggis uf eme gläine Waggis-Waage e Faart unternää und solle so an d Faasnachtsfigur "Waggis" zuechegfiert wäärde.

Ladäärne Ussstellig

Vom Määntigobe bis Mittwuchmoorge sin uf em Blatz vor em Basler Münschter sämtlichi Ladäärne - rund 200 - vo de Fasnachts-Gligge uusgstellt. Bsunders am Oobe, wenn d Ladäärne belüüchted sin, bieted dr Münschterblatz e be`iidruggendi Bild. D Uusschtellig bieted em Bsuecher und Zueschauer d Mögligkäit, sich in Rue d kunschtvoll erschtellte Zugladäärne bschaue und die zum Teil sehr sarkastische Väärs z studiere.

Schnitzelbängg / dr Bangg

D Schnitzelbänggsänger mache sich uf ironisch- bis sarkastisch- und witzigi Aart, mit Baseldütsch gsungene Thäggscht, teilwiis inschtrumental begläited, über Eräignis im abgloffene Joohr luschtig. Unterstützt wird iire Bangg meischt dur en Helge. Me ka de Schnitzelbangg nur im wiiteschte Sinn als Basler Entsprechig zur Büttenred ufffasse; sälle entspricht eher de "Zeedel", d Zeedel mitem in Väärsform bearbeitete Süüschee, welchi d Faasnachtsgligge am Gorteesch verteile. D Schnitzelbanggsänger drätte regulär am Määntig- und Mittwuchobe in den Kaffis und Bäize uff. Männgs hört me hütt jedoch au am Zischtig, allerdings nur in de Gligge-Käller, de paragastronomische Lokal vo de Faasnachtsgsellschafte.

Ändsträich

Dr "Ändstraich" isch s Ändi vo dr Basler Faasnacht. Dr witgehend unorganisierti Aalass findet in de letschte Minute vor 04.00 am Donnschtigmorge statt. Di Aggtiive keere vom Gässle im Verband zu iire Gligge zrugg, wobi jedi Gligge en andere Dräffphuggt in dr Innerstadt wäält. Es letschts Mol wird im Verband e Marsch pfiffe und drummlet und "Frau Faasnacht" verabschiidet. Drbi formiert sich d Gligge in zringsum iiri Ladäärne, um iir es letschts Mol d Reweränz z erwiise. Mit em Gloggeschlaag am vieri verschtumme d Inschtrumänt und d Larve wäärde abzoge.